អាមេរិក៖ តម្លៃមាសបានធ្លាក់ចុះខណៈវិនិយោគិនបានថ្លឹងថ្លែងពីលទ្ធភាពកើនឡើងអត្រាការប្រាក់កាន់តែខ្ពស់នាពេលអនាគត បន្ទាប់ពីការកើនឡើងប្រចាំខែខ្លាំងបំផុតនៅក្នុងរយៈពេល ៣ឆ្នាំ។
យោងតាមការកំណត់តម្លៃទូទៅរបស់ Bloomberg តម្លៃមាសដុំសម្រាប់ការចែកចាយភា្លមៗបានធ្លាក់ចុះ ០,៣ ភាគរយមកនៅត្រឹម ១ ២៨០,៥៨ ដុល្លារអាមេរិកក្នុងមួយអោននៅម៉ោង ១២ និង ៤៩ រសៀលនៅក្នុង ប្រទេសសិង្ហបុរី កាលពីថ្ងៃម្សិលមិញ។ តម្លៃមាសបានកើនឡើង ៨,៤ ភាគរយកាលពី ខែមករា ដែលជាការកើនឡើងខ្លាំងបំផុតតាំងពី ខែមករា ២០១២។
លោក James Bullard ប្រធានធនាគារកណ្ដាលអាមេរិក Bank of St. Louis បានថ្លែងកាលពីថ្ងៃ ទី៣០ ខែមករា ថា វិនិយោគិនគិតខុសដែលរំពឹងថា ធនាគារកណ្ដាលនឹងពន្យារពេលបង្កើនអត្រាការប្រាក់ហួសពីពាក់កណ្ដាលឆ្នាំ។ អ្នកចេញគោលនយោបាយបានលើកឡើងពីការកើនឡើងសេដ្ឋកិច្ច «ដ៏រឹងមាំ» នៅក្នុងសេចក្ដីប្រកាសព័ត៌មានកាលពីថ្ងៃ ទី២៨ ខែមករា។ អត្រាការប្រាក់កាន់តែខ្ពស់បានកាត់បន្ថយចំណាប់អារម្មណ៍លើមាសដោយសារតែជាទូទៅមាសផ្ដល់ប្រាក់ចំណេញឲ្យវិនិយោគិនតាមរយៈតម្លៃកើនឡើង។
លោក Zou Lihu អ្នកវិភាគនៅក្រុមហ៊ុន Citics Futures Co នៅទីក្រុងShenzhen ប្រទេសចិន បានថ្លែងថា៖ «ការប្រែប្រួលតម្លៃមាសបានចាប់ផ្តើម ហើយយើងរំពឹងថា វានឹងបន្តធ្លាក់ចុះ និងលំហូរនៃការរំពឹងពីការបង្កើនអត្រាការប្រាក់អាមេរិក។
តម្លៃប្រាក់សម្រាប់ចែកចាយភ្លាមៗបានធ្លាក់ចុះ ០,៥ ភាគរយមកនៅត្រឹម ១៧,១៦៤៥ ដុល្លារអាមេរិកក្នុងមួយអោន។ តម្លៃបានកើនឡើង ៩,៨ ភាគរយកាលពី ខែមករា ដែលជាការកើនឡើងប្រចាំខែខ្លាំងបំផុតចាប់តាំងពីខែមិថុនា។
តម្លៃផ្លាទីន បានធ្លាក់ចុះ ០,៥ ភាគរយមកនៅត្រឹម ១ ២៣៥,៦០ ដុល្លារអាមេរិកក្នុងមួយអោនស៍បន្ទាប់ពីកើនឡើងរយៈពេលពីរខែកាលពី ខែមករា។ តម្លៃផ្លាទីនស (Palladium) បានកើនឡើង ០,៣ ភាគរយមកនៅត្រឹម ៧៧៤,៣៨ ដុល្លារអាមេរិកក្នុងមួយអោនបន្ទាប់ពីការបញ្ចប់ការធ្លាក់ចុះប្រចាំខែជាប់ៗគ្នាលើកដំបូងនៅក្នុងរយៈពេលមួយឆ្នាំ៕
