ខេត្តកំពតះ ៖ សមត្តកិច្ចខេត្តកំពតចុះទៅបង្ក្រាបសង្វៀនជល់មាន់មួយកន្លែងនៅព្រំដែនវៀតណាម ។ ហេតុការណ៍នេះកើតឡើង កាលពីវេលាម៉ោង២និង៣០នាទី រសៀលថ្ងៃទី២១ មករា នៅក្នុងភូមិសាស្ត្រទល់ដែនយួន ក្នុងភូមិត្នោតឃុំត្នោតចុងស្រល់ស្រុកបន្ទាយមាស ជាប់ខ្សែបន្ទាត់ព្រំដែន បានលួចបើកសង្វៀនបញ្ជល់មាន់ដ៏ធំមួយ និងមានបង្កប់ល្បែងអាប៉ោងផងដែរ។ មកលេង យ៉ាងគឺគគ្រឹកគគ្រេង ដែលភាគច្រើន គឺជាជនជាតិយួនដែលមានគ្នាប្រមាណជាង១៥០នាក់ជិះសុទ្ធតែម៉ូតូ ។
បើតាមអ្នករាយការណ៍ព័ត៌មានបានឱ្យដឹងថាផ្លូវចូលទៅកាន់ទីតាំងនោះមានការលំបាកតែអាចជិះម៉ូតូចូលទៅបាន។កម្លាំងសមត្ថកិច្ចដែលចូលទៅបង្ក្រាបនោះមិនហ៊ានលើកគ្នាចូលព្រោងព្រាតទេខ្លាចក្រុមអ្នកលេងល្បែងទាំងនោះដឹង។ដូច្នេះហើយទើបប៉ូលិសដែលត្រូវបញ្ជូនឱ្យទៅបង្ក្រាបមានគ្នាត្រឹម៧-៨នាក់ប៉ុណ្ណោះ ឯកម្លាំងធំដែលមានគ្នាជិត២០នាក់ទៀតត្រូវចូលទៅតាមក្រោយ ។
ក្នុងការបង្ក្រាបសង្វៀនបញ្ជល់មាន់នេះដឹកនាំដោយឧត្តមសេនីយ៍ ម៉ៅ ច័ន្ទមធុរិទ្ធ ដែលជាស្នងការរងលោកវរសេនីយ៍ទោ លុត ញ៉ាង អនុប្រធានការិយាល័យព្រហ្មទណ្ឌកម្រិតធ្ងន់ និងមានការចូលរួមពីសំណាក់ព្រះរាជអាជ្ញារងអមសាលាដំបូងផងដែរ ប្រឈមនឹងការសម្រុកចូលមកតដៃរបស់ពួកលេងល្បែងនោះ ប៉ូលិសដែលមានគ្នាតែ៧ទៅ៨នាក់ក៏បានផ្ទុះអាវុធខ្លីដើម្បីគំរាមការសម្រុកចូលនោះ និងចាប់វ៉ៃខ្នោះបានពី៦ទៅ៧នាក់ផងដែរ ។ ប៉ុន្តែភាពហានក្លាដែលក្រុមជនជាតិយួនទាំងនោះដឹងថា ប៉ូលិសខ្មែរមិនអាចបាញ់ក្រៅពីបាញ់គំរាមឡើងលើនោះ ក៏មានការសម្រុកចូលរាប់សិបនាក់តម្រង់មករកប៉ូលិស ដែលទីបំផុតប៉ូលិសក៏រត់គេចវិញ រួមជាមួយអ្នកយកព័ត៌មានកោះសន្តិភាព ម្នាក់ដែលបានទៅជាមួយប៉ូលិស ដើម្បីយកព័ត៌មានក៏ត្រូវពួកយួនទាំងនោះដេញវាយនឹងដំបងទោះបីរត់យករួចខ្លួនក៏ដោយ ។ តែម៉ូតូអ្នកកាសែតនិងម៉ូតូប៉ូលិសត្រូវបានខូចខាតដោយការវាយបំផ្លាញពីក្រុមជនជាតិយួនទាំងនោះ ។
សូមបញ្ជាក់ថា នៅចំណុចនោះជាតំបន់ការពារព្រំដែនរបស់វរសេនាតូចលេខ ៣០២ របស់យោធា និងវរនគរបាលការពារព្រំដែនគោកលេខ៦០១ ដែលទំនងជាមានសំណែនពីពួកអ្នកលេងល្បែងទាំងនោះហើយ ទើបគេអាចចូលមកលេងបានម៉ាសេរីបែបនេះលើដីខ្មែរ ។ តាមព័ត៌មានចុងក្រោយបានឱ្យដឹងថាជនម្នាក់ជាកូនកាត់យួន នៅតំបន់តន់ហន់ត្រូវបានចាប់ខ្លួន ។
បើតាមសមត្ថកិច្ចថា ជននេះហើយជាមេខ្លោងបើកវង់ល្បែងស៊ីសងប្រមូលយួនចូលមកលេង ។ ជាមួយគ្នានោះ ម៉ូតូ៣គ្រឿងក៏ត្រូវបានចាប់រឹបអូសផងដែរ ។
មតិខ្លះនិយាយថា មិនត្រូវមើលស្រាលដល់ក្រុមជនជាតិយួនមកលេងល្បែងនោះឡើយ ដែលអាចបង្កគ្រោះថ្នាក់ដល់អាយុជីវិតបាន ប្រសិនបើមិនបានគិតពីសុវត្ថិភាពទេនោះ ។ អ្វីដែលមានភាពធ្ងន់ធ្ងរសម្រាប់អ្នករាយការណ៍ព័ត៌មាន គឺលោក កែវ ឆាត រត់ទាំងព្រលឹងចុងសក់ ចោលម៉ាស៊ីនថតរូបកាបូបប្រាក់ និងម៉ូតូត្រូវពួកយួនទាំងនោះវាយឱ្យខូចខាតទាំងស្រុង ៕
