ឆ្នេរសមុទ្រខេត្តព្រះសីហនុល្បីល្បាញថាជាឆ្នេរជាប់ចំណាត់ថ្នាក់លេខ១ ក្នុងបញ្ជីឆ្នេរស្រស់ស្អាតជាងគេលើពិភពលោក ត្រូវបានគំរាមគំហែងរំលោភសាងសង់តាមអំពើចិត្ត គ្មានក្រែងរអាផ្លូវច្បាប់បន្តិច តួយ៉ាងដូចជា រោងតន្ត្រីបំរើរាត្រីសមោសរថ្មីៗនេះ បានផុសត្រដែតលើផ្ទៃទឹកសមុទ្រ តំបន់ឆ្នេរមុខសាលាខេត្តព្រះសីហនុ ខាងក្រោយសណ្ឋាគារហ្គោលដិនស៊ី ស្ថិតក្នុងភូមិ ៣ សង្កាត់ ៣ ក្រុងព្រះសីហនុ ត្រូវបានគេមើលឃើញថា ចាប់ផ្តើមបង្ហាញពីភាពអាណាធិបតេយ្យតាមបណ្តោយឆ្នេរ បន្តបន្ទាប់។
ប្រជាពលរដ្ឋដែលជាភ្ញៀវទេសចរណ៍ និង ភ្ញៀវបរទេសដែលមកកំសាន្តតាមបណ្តោយឆ្នេរខាងលើ បានលើកឡើងថា តំបន់ឆ្នេរដែលជាឆ្នេរខ្សាច់សក្បុស ដូចសំឡីនោះ ត្រូវបានគេមើលឃើញថា សំណង់អាណាធិបតេយ្យ បានចាប់ផ្តើមសាងសង់ទៅលើផ្ទៃទឹកសមុទ្រជាបណ្តើរៗ ធ្វើអោយប៉ះពាល់សោភ័ណភាពឆ្នេរសមុទ្រ និង ប៉ះពាល់ ដល់បរិស្ថាននិង ប្រព័ន្ធជីវចំរុះ ដែលពីដើមឡើយ គេពុំឃើញមានភាពអនាធិបតេយ្យច្របូកច្របល់ គ្មានច្បាប់ទំលាប់ នេះបញ្ជាក់អោយឃើញថា ជាសញ្ញាណមួយថ្មី និង ជាបច្ច័យអាក្រក់ដល់តំបន់ឆ្នេរ។
មន្ត្រីម្នាក់សុំមិនបញ្ចេញឈ្មោះ បានអោយដឹងថា ទីតាំងសណ្ឋាគារហ្គោលដិនស៊ីខាងលើនេះ ត្រូវបានម្ចាស់សណ្ឋាគារជួលអោយជនជាតិកូរ៉េធ្វើការវិនិយោគទៅលើវិស័យសណ្ឋាគារនេះ ហើយការសាងសង់រោងតន្ត្រីលើទឹកសមុទ្រខាងលើនេះ មានការឃុបឃិតពីមន្ត្រី សាលាខេត្តមួយចំនួន ដោយបើកភ្លើងខៀវពីអភិបាលខេត្តរងម្នាក់ ដើម្បីបើកផ្លូវអោយជនជាតិកូរ៉េដែលវិនិយោគសណ្ឋាគារនេះសាងសង់រោងតន្ត្រីនៅលើទឹកសមុទ្រ និង ដាក់ស្លាយបញ្ចាំងច្រៀងបំពងសំលេងពីលើទឹកមកលើគោក សំរាប់បំរើអោយអ្នកទទួលទានអាហារផឹកស៊ីនៅពេលរាត្រី ។
ទាក់ទិនជុំវិញបញ្ហាខាងលើនេះ ឯកឧត្តម ជិន សារិន បានអោយដឹងថា រឿងនេះឯកឧត្តម បានទៅដល់កន្លែងនោះមុនគេ ហើយឯកឧត្តម បានបញ្ជាក់ថា ខេត្តជាអ្នកអោយធ្វើ បើចង់ដឹងសួរទៅខេត្ត ។
ដោយឡែក ឯកឧត្តម ស៊ុន ស្រ៊ន់ កាលពីរសៀលថ្ងៃទី ២៩ ខែ តុលា ឆ្នាំ ២០១៤ ម្សិលមិញនេះ បានអោយដឹងតាមទូរស័ព្ទថា រឿងនេះ ឯកឧត្តមពុំបានដឹងនោះទេ ហើយឯកឧត្តមបានបន្តទៀតថា ឯកឧត្តមនឹងពិនិត្យមើលតើមានច្បាប់ឬ មួយយ៉ាងណា ៕ ដោយ ភ្នំព្រឹក
